Frederik Paulsen as a 31. jüüle 1909 uun Doogebal bäären. An uk wan hi ei üüb Feer bäären as, wiar hi al sant sin jongensjuaren feest mä Feer ferbünjen. Sin aalern kaam nemelk faan diar, an bi a post uun Doogebal, huar san aatj werket, kaam leewen a feringen iin, so dat hi uk föl fering tu hiaren fing.
Dat a jongen a huuger skuul beschük küd, toog a Paulsens 1917 tu Kiel, huar Frederik üüb’t gymnasium ging. Hi wiar uun ales intresiaret an ham siig ham leewen mä’n buk föör a nöös.
Al uun a Weimarer Republik hiard hi tu’n studentenskööl, wat politisk lachts sted. San aatj wiar baang, dat Frederik döör detdiar iinsteling grat komer fing. Diaram reet hi ham diartu, medesiin tu studiarin, ofwel Frederik muar för filosofii, histoore an literatüür auerhed.
Man at kaam ütj, dat hi jin a nazis wiar. An üüs hi ens en artikel uun en bleed auersaat an ütjbroocht hed, huar wat jin a nazis sted, steet jo ham uun’t suart hool. Diar frinjigt hi ham mä’n maan faan Oomrem uun. Dön tau snaaket bluat fresk mäenöler, so dat a ölern jo ei ferstun küd; at fering an öömring wiar för jo so tu en gehiamspriik wurden.
Üüs Frederik entleet wurd, as hi glik deel tu a Schweiz taanjen, huar hi 1935 sin studium ufslood. Diarbeeft beslood hi, tu Sweeden ütjtuwaanrin. An Sweeden wurd sin öler aran, heer befreid hi ham, fing jongen an forsket uun a endokrinologie. Auer a grat firmen jo ei för sin werk intresiaret, hee hi 1950 uun Malmö sin aanj firma grünjlaanjen. Fjauer juar leeder ded hi sin onernemen de nööm Ferring AG. För de nööm hed hi tau grünjer: De nööm skul uk uun öler spriiken lacht tu leesen wees, an at skul natüürelk uk en ferbinjing tu Feer wees. Det Ferring AG wurd uun a luup faan a juaren en grat an bekeend onernemen üüb a hial wäält.
Mä söstig toog Frederik Paulsen ham do so eewen faan’t gescheft turag an san jongst dring auernaam det firma. Hi salew toog mä sin naist wüf Eva turag tu Aalkersem, uun’t aalernhüs faan sin mam.
Nü küd hi ham noch starker am at fresk saag komre. Hi kaam ei bluat tup mä lidj ütj Nuurdfresklun, man uk ütj Uast- an Waastfresklun. Muar an muar wurd hi tu de spreeger faan a nuurdfresken, an hi fermadelt, wan at am fraagen faan a manerhaiden ging. Hi hee uk föl diartu bidraanjen, dat 1948 at Nuurdfresk Instituut grünjlaanjen wurden as.
1988 hee Frederik Paulsen a Fering-Stifting uun’t leewent repen. Diarmä hee hi det grünjlaag skaafet, dat Feer an Nuurdfresklun en iinrachting hee, wat uk faan’t jil heer uun a laag as, at aaing spriik an kultüür tu bewaarin.
Frederik Paulsen stoorew a 3. jüüne 1997 mä 88 juar aran uun Aalkersem.